Schöni Feschttäg

Reflektione

Hüt si mir wieder dusse gsi u die nasse Strasse hei üs s'Thema vorgäh: d'Liechter, wo sich ufem Asphalt spiegle, müglechscht würkigsvoll mit dr Kamera ifah. Äs isch nid unbedingt um d'Wiehnachtsbelüchtig gange, eher süsch so, was da aues lüchtet. Einisch meh het's Spass gmacht - mit äm Resultat weiss ig säuber nid so rächt. Aber weder Luscht heit, lueget doch säuber...
Zur Galerie

Wiehnachtsmärit

Hüt hei mir üse nächscht Usse-Termin gha - zytgemäss isch s'Thema "Wiehnachtsmärit" ufem Programm gstande. Isch auso gar nid so eifach, bi dene Liechtverhäutnis würklech schöni Fötelis z'mache... Muess auso demnächscht mau chlei mit Stativ, Langzitbeliechtig u Blitz ga üebe. Eis Biudli het mir de doch no irgendwie gfaue u zwar dä "Ängu i de Gasse vo Bärn". Ehrlecherwis cha ig nid mau mit Bestimmheit säge, ob ig das Föteli knipst ha, oder dr Tim... Aber egau, isch hübsch, oder?

Arrangement

Mit viu Blim-Blim hei mir hüt Abe üses erschte Arrangement arrangiert (macht Sinn, oder?). Isch aber aues angere aus eifach u mir hei pröblet u pröblet bis üs schier d'Arme u dr Rügge hei weh gmacht. Nachdäm mir churz vor Schluss no souverän ä "Panne" gmeischteret hei, isch üs doch no dä Prachts-Klick glunge :-)

Merci viu mau Evelyne, Doris, Martin und last but not least Claudio für dä lässig Abe - äs het ganz fescht gfägt!!

Dampfzentrale & Gaschessu

Unger dr Beobachtig vo dene zwene düschtere Kamerade bini hüt mit dr Kamera chlei um d'Dampfzentrale u ume Gaschessu desume gschliche. Isch ä spannendi Gägend u ig ha wieder ä huufe Sache gseh, wo mir vorhär nid si ufgfaue... ;-)
D'Föteli chame hie luege.

Kostenloses eBook: Die Schule der Schwarzweiss-Fotografie

Soäbe im Netz gfunde:
Kostenloses eBook: Die Schule der Schwarzweiss-Fotografie

Das eBook chame bis am 31. Dezämber 2011 gratis abelade.

Twitter-Widget

Uf dere Site chame sich s'Originau-Twitter-Widget hole u när diräkt uf sim Blogspot ibinde. Widget u Gadget isch nach mim Verständnis s'Gliche.

Hintergrundbiud

Da ig scho grad dranne bi, hani no äs eigets Hintergrund-Biud wöue ifüege. Wär zwar ä schöni Idee, aber ig cha nume dervo abrate - usset me tuet eifach nume ä Farb hingerlege. Ig ha mit ämene Foto probiert u das gemäss de Vorgabe (Grössi & KB's) ufbereitet. Z'Problem isch, dass das Biud när mehrfach azeigt wird, we Post-Liste länger wird. Ufem Compi het's no so haubwägs usgseh, aber ufem iPhone u iPad isches nümme Schöns gsi...

Test-Poust via iPhone

Ha grad s'Blogger App abeglade u bi gspannt, ob das funktionert. Zum Üebe setzi irgend äs Foto i, woni ufem Händy ha - hoffentlech findi äs schöns...

Erscht Poust uf Blogspot :-)

Am 1. Novämber 2011 hei mir üse erscht "Uswärts-Termin" gha u zwar grad uf DÄM Platz ir Schwiz - ...oder z'mingscht in Bärn: Ufem Bundesplatz. Vom 14. Oktober 2011 bis 26. Novämber 2011 findet dört ungerem Name Rendez-vous Bundesplatz ä fantasteschi Liechtshow statt. Da hei mir üs natürlech nid la engah u si das Spektakel - usgrüschtet mit Kamera u Stativ - ga ifaa.

Isch ä lässige, zfridne Abe gsi u d'Resultat chame hie aluege.