Bös...

...driluege - genau das hei mir hüt gmacht! Aber nid, wüu dr Ungerricht ke Spass hätti gmacht, sondern wüu das ds'Thema isch gsi: Herti, bösi Portraits z'mache. Auso zum eine z'Fötele, mit äm müglechscht bös Usdruck u im richtige Liecht. U när die Biuder im Photoshop no entsprächend "verschärfe".

Wes eim nid drum isch bös z'luege, de isch das nid ä so eifach u de chöme ender ä so Grimassene derbi use. Aber tant pis...

Die schön Überraschig deheime isch gsi, dass mir d'Nachbearbeitig (oder Ufwärtig... ;-) mit äm Photoshop Elements glich glunge isch, wie ir Schuel mit dr Voll-Version.

Photoshop:

Photoshop Elements:

I däm Sinn - Guät Nacht auersits u kener Albträum!

PS: Bi dene Föteli si d'Eve u d'Sabrina am Drücker gsi.

Vorhär - Nächhär

Dr Tim het üs ganz dezänt druf ufmerksam gmacht, dass üser Biuder relativ sch......lächt us dr Kamera chöme. Zum Eine liegt das sicher (o no) a üs, zum Andere aber ou ar Qualität vor Kamera. Drum hei mir üs chlei intensiver mit Photoshop beschäftiget, so dass mir us dene no nid so optimale Biuder, schöni Föteli chöi mache. Übere Isatz vo Photoshop chame sicher diskutiere - bir digitale Fotografie ghörts haut eifach derzue.

Hie auso mis Tescht-Biud, woni übrigens nid mit dr Nikon D300 gschosse ha, sondern mit dr chline Panasonic LUMIX DMC-TZ7, woni geng im Täschli derbi ha.

Originau:

Bearbeitet:

Weme se aklickt wärde d'Biuder grösser dargstellt u de gseht me o dr Ungerschied besser.

Forme erkenne

...u die när o entsprächend ufs Biud bringe. Ganz simpu, oder?

Auso, zersch hei mir üs für irgend äs Objekt us üsere Täsche müesse entscheide. Bi mir isch d'Wahl uf mis Portemonnaie gfaue. När hei mir das Objekt ganz genau müesse beschribe u vorallem o, was für üs wichtig isch. I mim Fau auso, was zeichnet das Portemonnaie us? Für mi isches dr Klappverschluss, dr Metall-Spaut, die typischi Portemonnaie-Form u ds farbige Muschter. So, u itze das aues ä so fötele, dasses überechunnt... Auso vo simpu cha ke Red si.

Dank de hälfende Händ u Inputs vor Babs u vom Marco isch du das Foto entstande. Merci viu mau öich beidne :-)

...u itze no chlei nach links, stop, guät...

Ungfähr ä so hets geschter Abe tönt - u natürlech het me ono nach rächts, hingere oder füre chönne, oder dr Blick liecht nach ufe, nach abe oder wie o immer... Konkret, mir befasse üs witer mit dr Portrait-Fotografie u dismau isches drum gange, müglechscht dunkli Biuder z'schiesse. Isch auso cheibe schwierig mit däm Liecht umzgah u nach Afangs-Schwierigkeite isches de geng chlei besser gange u am Schluss hei mir gar nümme wöue ufhöre! Isch wiederum ä fägige Abe gsi - merci aune Beteiligte, das macht ächt Spass!!
Hie d'Best of... - äs si leider nid so viu, obwouh d'Models dr Hammer si gsi ;-)